Kung ang tawo namatay nga wala pa makadawat kang Kristo, atua na ba siya sa impyerno? Kini mao ang pagtoo sa kadaghanan nga mga Kristiyano. Mao pod kini ang nakapadasig sa mga Kristiyano ug mga misyonaryo nga isangyaw ang maayong balita bisan pa ug delikado ang lugar nga ilang adtoan.

Wala bay Mahimo Ang Ginoo?

Mura ba ug atong gihunahuna nga ang Ginoo walay mahimo nga luwason ang mga tawo sa laing paagi gawas lang sa atong gitoohan nga kahibalo — nga kung namatay na ug wala pa makadungog, diretso na sa impyerno. Kadakong sayop niini!

Dili Angay Mabalaka

Daghan kitay wala nahibaloan kung kanus-a molihok ang Diyos sa kasingkasing sa mga tawo aron sila dad-on ngadto sa pagtoo. Pero daghan usab kita ug nahibal-an, ug kining atong nahibal-an maoy nagahatag kanato ug daghang rason aron dili mahadlok bahin sa atong mga minahal sa kinabuhi nga wala pa makapadayag sa ilang pagtoo usa sila namatay. Isalig nato sa Ginoo kining mga butanga.

Ang Ginoo Mapailobon

Una ug importante sa tanan, nakahibalo kita sa kasingkasing sa Ginoo bahin sa tanang katawhan apil na kadtong wala pa makadungog sa maayo balita. “Siya mapailobon kaninyo” si Pedro misulat sa 2 Pedro 3:9, “wala magtinguha nga adunay mahanaw kondili nga ang tanan managpakakab-ot unta sa paghinulsol.”

Ang Ginoo Dili Malimitahan

Ang Ginoo dili pwedeng mapugngan sa tawhanong kamatayon. Walay makaboot o makapugong kaniya kung unsay iyang gusto. Gipildi na ni Hesus ang kamatayon. Ug si Hesus dugay nang gibayran ang tanang tawhanon nga mga sala usa pa kita nangatawo. Sa 1 Juan 2:2, si Juan misulat bahin ni Jesus nga, “ug siya mao ang halad-pasighiuli alang sa atong mga sala, ug dili lamang sa ato rang mga sala kondili sa mga sala usab sa tibuok kalibutan.”

Kung dili man nato mahibaloan kung unsaon o kanus-a ang Diyos molihok sa kasingkasing sa kada-usa, apan nakahibalo kita nga si Jesus miingon sa Juan 12:32 nga, “Ug ako, sa ikaisa na ako gikan sa yuta, magakabig sa tanang tawo nganhi kanako.”

Ug nakahibalo kita nga sa Juan 3:17, si Jesus miingon, “Kay gipadala sa Dios ang iyang Anak nganhi sa kalibutan, dili aron ang kalibutan iyang pagahukman sa silot, kondili aron ang kalibutan maluwas pinaagi kaniya.”

Ang Ginoo Manluluwas

Ang tumong sa Ginoo mao ang pagluwas sa makasasala, dili aron ikondena sila, mao man gali nga ang Anak, nga mao ang perpektong pagpaila sa Amahan, nahimong sama kanato ug iyang giangkon ang atong mga sala aron kita luwason.

Makasalig kita sa Ginoo nga higugmaon niya ang atong mga minahal sa kinabuhi labaw pa sa atong gugma. Makasiguro kita nga ang Ginoo mohimo ug mga paagi aron sila makadungog ug mahatagan ug higayon sa mga paagi nga wala kita makahibalo ug dili nato matugkad.

Ang Ginoo Gugma

Ang Diyos gugma, ang Bibliya nagaingon, ug sa nasulat ni Pablo sa Roma 13:10 nga, “Ang gugma dili mohimog dautan ngadto sa silingan.”

Si Pablo nagaingon kanato sa Colosas 1:19-20, “Kay diha kaniya nahimuot sa pagpuyo ang bug-os nga kinatibuk-an sa Dios, ug pinaagi kaniya nahimuot kini sa pagpasig-uli, nganha sa iyang kaugalingon, sa tanang mga butang sa kayutaan o sa kalangitan, ug naghimo sa kadaitan pinaagi sa iyang dugo diha sa krus.”

Impiyerno Para Sa Dili Gusto

Ang impiyerno dili alang sa makasasala, kay kung mao na, kitang tanan padulong didto. Ang impiyerno maoy nagustuhan ug maoy gipili sa mga makasasala nga dili na gustong magbag-o, kadtong mga desidido na gyud, tinuyuan, ug permanente na gyud nga mibalibad sa walay paglubad nga gugma sa Ginoo nga nagapasaylo ug nagpasig-uli sa mga makasasala.

Ang Ginoo Dapig Kanato

Ayaw gyud ug kalimti nga ang Ginoo dapig kanato. Pabor siya kanato, dili kontra, ug wala siya malipay sa kamatayon sa mga dautan. Isalig ang inyong mga minahal sa kinabuhi ngadto kaniya. Naa sila sa maayong kamot.